"ليس لنا دخل في قضية فلسطين واللي عاوز يحارب يتفضل"...تداول تسجيل صوتي نادر للرئيس المصري جمال عبد الناصر و الرئيس الليبي معمر القذافي

صحيفة المرصد: تداول رواد مواقع التواصل، تسجيل صوتي مسرب لمكالمة بين الرئيس المصري الراحل جمال عبد الناصر والرئيس الليبي الراحل معمر القذافي، حول طلب القذافي تشكيل قوة عسكرية موحدة لتحرير فلسطين بالكامل، فيما أوضح عبد الناصر أن موازين القوة ليست في صالحهم ودعا من يريدون الحرب إلى تشكيل قوة عسكرية ومحاربة إسرائيل.

اللي عاوز يكافح.. يكافح 

وقال عبد الناصر: " إذا كان حد عايز يكافح.. يكافح، إذا حد عاوز يناضل.. يناضل، لكن النهاردة بيقولوا يا فلسطين كلها من النهر إلى البحر يا مش كلها، معنى الكلام اللي بيقولوه العراقيين إننا بندي الضفة العربية والقدس وغزة لليهود وفي خلال سنة أو سنتين كل المناطق دي تتهود، وأمريكا بتساند إسرائيل بفلوسها وأسلحتها، وكيف هيحرر العراق بميزانية 70 مليون جنيه، كان يكون أسهلي يا أخ معمر، وأوعى تفتكر أن أنا مثلا قبلت هذا القرار لمكسب شخصي أنا عارف ممكن الفدائيين يجوا يقتلوني يعني ممكن حد من الفلسطينيين في هذا الموضوع، لأنهم بيقولوا عبد الناصر خان وسلم في قضية فلسطين، وممكن ناس حتى مصريين يقبلوا بهذا الكلام وأنا عارف أنا بعمل إيه، والعراقيين ممكن يحرضوا ناس ويقولوا لهم عبدالناصر خان القضية وسلم في فلسطين واعترف بوجود إسرائيل وزي الكلام اللي قاله حردان وزي في 54 لما قالوا إن أنا في اتفاقية الجلاء مع الإنجليز  خنت لما أدتهم حق الاحتفاظ بقاعدة 7 سنوات، وطلع واحد ضربني بالرصاص، وأيامها وقف محمد نجيب وناس ضد الاتفاقية، بس العملية كانت إن الإنجليز ماشيين من البلد وهنا الموضوع الشخصي ما يهم أبدا". 

هيحصل زي 40

وتابع، اللي بيقول هنحرر، لا هنحرر ولا هنعمل هيحصل زي 48، هذا كلام مرير، لكن مين هيحرر الضفة الغربية ، معنى هذا إننا بندي بقية فلسطين لليهود، هل هذا هو المطلوب، ورغم هذا بقول إن الحل السلمي بعيد المنال يعني لازم يبقى في موقف دولي خطير يدفع أمريكا إلى أنها تضغط على إسرائيل لأن أمريكا هي اللي في أيدها الموضوع تضغط على إسرائيل عشان تنسحب، لكن انسحاب بدون مقابل معتقدش هيحصل. 

اللي عايزين قتال يتفضلوا

وأردف، اللي عايزين قتال وتحرير اتفلضوا، الجزائر وسوريا والعراق وياسر عرفات وجورج حبش اتفضلوا اجتمعوا وإحنا هنقاطع الاجتماع وحاربوا وأنا مستعد أعطيكم 50 مليون جنيه معونة، وحلوا عننا ، سيبونا أحنا في جبهتنا الغربية وسيناء. 

هنحارب الدنيا كلها 

وأكمل، مشكلتي عاوز أحرر الضفة الغربية ، بنرجع الأرض اللي فقدناها في 67 وبعدين نشتغل عشان نرجع الأرض اللي فقدناها سنة 48، أما عشان نوصل إلى تل أبيب قصاد كل الدول الكبرى وخاصة أمريكا وروسيا وفرنسا وإنجلترا والعالم كله اللي بيقول إسرائيل يجب أن تحتفظ بهذه الأرض لأن إسرائيل مهددة بالعدوان من العرب، دا موقف دولي ، يعني هنحارب الدنيا كلها.  

اليهود أشطر 

ورد القذافي: " وماله نحارب الدنيا كلها، وخلاص إذا نحنا مش قادرين على البقاء "، ورد عبد الناصر قائلا: " لا اليهود أشطر مننا، اليهود خططوا على 25 سنة ، أخذوا فلسطين كلها،  من 47 أخذوا التقسيم و48 أخذوا أكثر من التقسيم و56 أخذوا سيناء وضموها ورجعوهالنا تاني و67 أخذوا بقية فلسطين كلها وبيقولوا لازم نكمل ونأخذ من النيل إلى الفرات ، إحنا بنتصور كعرب دايما نقول يا نعمل النهاردة يا يبقى مفيش فائدة ، إحنا بنقعد نخطط ورأيي دلوقتي لو قدرنا نأخذ الجزء ده نأخذه بصرف النظر وبعدين بنخلق مواقف بنسترد الباقي لكن كيف تحرر تل أبيب ، اليهود متفوقين علينا برا وجوا، رغم كل ما عملناه وكل ما صرفناه، أنا مش بقول هذا الكلام لأني انهزامي أنا بقول أن أحنا إذا كنا عايزين نحقق هدف لازم نكون واقعيين ونعرف هنحققه أزاي". 

لم يعطونا طيارين 

ورد القذافي قائلا: "نحققه بإننا نحشد القوة العسكرية"، ورد عبد الناصر قائلا: " احشدوا، أنا مش مانع حد أنه يحشد قوته العسكرية، هم قوتين عسكريتين اللي ممكن يحشدوا هم العراق وبومدين، وممكن يصرفوا، احشد هذه القوات واعطونا 16 طائرة أنا مش عايز طائرات أنا قلت لبومدين أنا مش عاوز طائرات أنا عاوز طيارين، في مؤتمر الرباط قلت لهم أنا عايز فلوس وعايز طيارين، عايز فلوس أشترى أسلحة عندي تعاقدات هدفع 25 مليون، وعندي طيارات عايز لها طيارين، قال "ما بيقدر يديني طيارين"، روحنا بعد كدا الاتحاد السوفيتي أعطونا الطيارين، الطائرات الميج 21 اللي هي f13، هم قالوا هيدونا 40 ، أعطونا 16، أنت عارف إحنا خسرانين كام طائرة من 67 لحد الآن 102 في التدريب والمعارك ، مفيش استنزاف من جانب واحد ، في استنزاف واستنزاف مضاد ، أنا لما أجي استنزفك النهاردة، أنت كمان لازم على طول تقول أنك هتستنزفني، إحنا لما أخذنا قرار الاستنزاف، عارفين أن اليهود هيعملوا لنا استنزاف مضاد ، وقعدنا حسبنا وقلنا إننا نقبل في استنزاف مضاد إلى الآتي، 10 مصريين قصاد عسكري يهودي، ودا معناه إننا كسبانين، ولو نموت واحد يهودي وهم يموتوا لنا 10 مصريين راضيين بهذا ، يعني مكنش حد في الدنيا بيضحي بهذا الشكل ، لكن كان ممكن أقعد زي العراقيين وما يبقاش وقف إطلاق نار ، وهم كلهم اشتكوا من عدد القتلى والجرحى في جبهة القناة ، الكلام قد يكون سهل جدا ، وإن نحن نحشد قواتنا ، وإحنا من سنة 48 بنتكلم في هذا الكلام يعني مش أول مرة ولا حد عمل حاجة ، أنا عندي اقتراح تروحوا بغداد وجربوا، أحنا بنبعد عن العملية، أحنا بتوع الحل السلمي الانهزامي، وأنا قادر أتحمل هذا وضميري مرتاح، واتفضلوا الناس اللي عاوزة تحارب تحارب، مش أنتم بتقولوا دي معركة عربية".

ليس لنا دخل في القضية الفلسطينية 

وأضاف: "إحنا لن نتصرف في أي شيء وإحنا هنتفق في الاتفاق مع بارنج نتكلم على سيناء ليس لنا دخل في القضية الفلسطينية ولا في الحدود الآمنة ولا في أي شيء، هنتكلم عن سيناء بس، يتفضلوا هم يمشوا من سيناء والحدود، والمساعدة اللي أنتم عايزنها مننا هنساعدكم فيها، يعني القاه في اليم وقال له إياك إياك أن تبتل بالماء ، يعني تمسكونا وترمونا في البحر وتقولوا متتبلوش، دلوقتي الموقف بهذا الشكل ، إحنا الوحيدين اللي بنحارب وبتقولوا لنا اتفضلوا حاربوا، وهتحاربوا اليهود ويضربوا فيكم، وإحنا كمان نحاربكم مع اليهود".