منى زكي: من نعم ربنا الكبيرة وجود جوزي وأولادي في حياتي ومش قادرة أطلع من أم كلثوم

تحدثت الفنانة منى زكي عن الهجوم الذي تعرضت له في فترة من الفترات، مشيرة إلى أن وجود جوزها وأولادها في حياتها هون عليها الكثير، وذلك خلال إحدى لقاءاتها التليفزيونية على هامش فعاليات مهرجان البحرين السينمائي.

منى زكي: شغلتي علمتني أبقى إنسانة أكتر

تحدثت منى زكي عن تفاصيل تعرضها للإنهيار وذلك بعدما تعرضت لهجوم عنيف بسبب أحد أعمالها الفنية، قائلة في تصريحات رصدها موقع تحيا مصر: إزاي بتعامل مع الهجوم؟ بيبقى في انهيار في الأول وبعد كده بلملم نفسي وبقول أنا عندي حاجات أهم في حياتي وأهداف أهم من أي حد بيحاول يكسرني، هما مش شايفين أنا عايزة أعمل إيه، ممكن أقعد في البيت بالأربع والخمس سنين حصلي وبتبقى أقسى اللحظات، قعادك في البيت مضطرة بتمر بمراحل كتير اكتئاب وانهيار ومحاولة استيعاب أن في حاجات في الدنيا غير الشيء دا وبتحاولي تتفاعلي مع باقي الحاجات.

وتابعت: من نعم ربنا الكبيرة وجود جوزي وأولادي في حياتي دا اللي بيخرجني دايما من أي انكسار أو ضياع هما شيء أساسي بالنسبة ليا هما بيحسسوني أن في دنيا تانية وأهداف تانية في الحياة غير شغلي اللي هو مهم جدا بالنسبة ليا لأني ابتديت اشتغل من وأنا صغيرة أوي، شغلتي علمتني أبقى إنسانة أكتر الإيجو بتاعي يقل لأنك في لحظات بتكوني فيها فوق في السما وبعدها بتنزلي للبدروم، كانت مساندة كبيرة من الوسط الفني ليا وشكرا شكرا مليون مرة.

منى زكي: شخصية أم كلثوم لسة مأثرة فيا لحد دلوقتي 

وتابعت منى زكي حديثها: اتعلمت بشكل مش عادي حاجات كتير أوى في الفيلم ده، ولغاية دلوقتي أنا جوايا مش قادرة أسيب جوايا حاسة إني بصحى من النوم مع إني مخلصة من 10 أيام تقريبا بقول أنا نسيت أذاكر كذا لثومة،  أنا نسيت أحفظ وأقول لنفسي إنتي خلصتي، كل يوم بحاول أفكر نفسي إني خلصت، في شخصيات بتأثر فيكي مش شرط تجيب اكتئاب بس فكرة إنك مش عايزة تسيبيها ومش عارفة ترجعي لنفسك أوي بتبقي مزنوقة في النص.

منى زكي وفيلم رحلة 404

وكانت قد تألقت منى زكي في فيلم رحلة 404 إلى جانب كلا من النجوم محمد فراج، محمد ممدوح، شيرين رضا، خالد الصاوي، عارفة عبد الرسول، والعمل من تأليف محمد رجاء، وإخراج هاني خليفة، إنتاج محمد حفظي، وشاهيناز العقاد وهم على موعد مع طرح فيلم رحلة 404 عبر منصة شاهد.